Por vizitantoj per Pasporta Servo

Se vi volas viziti nin per Pasporta Servo, bonvolu atenti niajn kondiĉojn: petu 5 semajnojn antaŭe, ĉar ni ofte forestas. Ni akceptas maksimume 2 gastojn dum 2 noktoj, kaj ambaŭ gastoj regu Esperanton.

Ni loĝas en vilaĝo Oostrum, parto de la komunumo Venray en la provinco Limburg, Nederlando. Tie ni havas domon. Jen kelkaj fotoj:

Vi dormos en la ĉambro sube, maldekstre.	Malantaŭe ni havas agrablan ĝardenon.

Ni havas komfortan dupersonan gastliton, ne necesas kunporti littukojn aŭ dormsakon. Ni preparos por vi bongustan matenmanĝon, kaj se ni estas hejme (kaj se vi volas) vi povas ankaŭ vespere manĝi kun ni.

Kiel atingi nin?

La domo estas proksime al trajnstacidomo Venray (sur la linio de Nijmegen al Venlo), nur kvaronhora promenado. Ankaŭ la aŭtoŝoseo A73 (elirejo 9) estas tuj apude. Jen mapo, ni loĝas je "A":

Pli granda mapo

Kion viziti?

Jen kelkaj ideoj por via vizito. Ni cetere malofte havas eblecon akompani vin...

• Promenado aŭ biciklado en la arbaro aŭ la vilaĝo de Geijsteren
• Naĝi aŭ sporti en parko Witte Vennen
• Arto en Odapark, Venray
• Informoj pri Norda Limburgo en la nederlanda, germana kaj angla
• Nijmegen kaj Venlo, facile atingebla trajne

Iom pli pri ni

Mi estas Derk Ederveen, depost majo 2007 mi verkas tekstojn en mia propra kompanio Skribo. Se bezonate, mi verkas ankaŭ en Esperanto! De 1996 ĝis 2007 mi laboris en Amsterdam ĉe AccountView, kiu produktas programon por firmaoj por librotenado, projektadministrado k.s.. Mi ĉefe okupiĝis pri la TTT-ejo, pri la manlibroj kaj pri la lingvaĵo en la programo.

Miaj hobioj estas komputilumado, ludoj (kiel Risk, Carcasonne, Babel aŭ Yinsh), kaj viziti restoraciojn, koncertojn, spektaklojn kaj teatron. Rilate al Esperanto mi longe okupiĝis pri Pasporta Servo (www.pasportaservo.org), kiun mi administris de 1995 ĝis 2008. Antaŭe mi interalie aktivis en Nederlanda Esperanto-Junularo, gvidis Esperanto-kursojn en Nijmegen kaj Den Haag, kaj kunorganizis IJK 1989 en Kerkrade.

Depost 1987 mi loĝas kun mia amikino Lilian van der Burgt, ni renkontiĝis per Esperanto. Ŝi estas tradukistino, tradukas de la angla al la nederlanda. Ŝi ankaŭ laboras hejme, kaj havas sian propran kompanion Traduko.

© 2009 Derk EDERVEEN 01-11-2009